सफ्टवेयरमा नेपाललाई आत्मनिर्भर बनाउन आवश्यक : सञ्चारमन्त्री शर्मा

दाङ — सञ्चार तथा सूचना प्रविधिमन्त्री एवं सरकारकी प्रवक्ता रेखा शर्माले सूचना प्रविधिमा बलियो हुन सफ्टवेयरमा नेपाललाई आत्मनिर्भर बनाउन आवश्यक रहेको बताएकी छन् ।

नेपाल पत्रकार महासंघ दाङ शाखा लगायत विभिन्न सञ्चार संगठनले आइतबार घोराहीमा आयोजना गरेको सम्मान तथा बधाई कार्यक्रममा बोल्दै शर्माले नेपालको आफ्नो सफ्टवेयर र प्रविधि नहुँदा ह्याक र चोरी हुने समस्या बढेको बताइन् । विदेशी प्रविधिमा भर पर्दा नेपालका गोप्य सूचनाहरू चोरिने जोखिम रहेको भन्दै उनले आफ्नै देशको दक्षता उपयोग गरी सफ्टवेयर निर्माण गर्ने योजना रहेको बताइन् ।

मन्त्री शर्माले हुलाकको पुनर्संरचना गर्ने योजना रहेको बताइन् । मिडिया विधेयक छिट्टै पास गराउन भूमिका खेल्ने पनि उनले जानकारी दिइन् ।

कान्तिपुर दैनिकमा प्रकाशित