फ्रि मिडिया नेटवर्क दाङको बैठक सम्पन्न

फ्रि मिडिया नेटवर्क दाङको बैठक २०७९ फाल्गुन १ गते सोमबार नेपाल पत्रकार महासंघ दाङ शाखा कार्यालयमा बसेको छ । नेटवर्कका अध्यक्ष एवं नेपाल पत्रकार महासंघ दाङ शाखा अध्यक्ष दुर्गालाल केसीको अध्यक्षता र नेपाल पत्रकार महासंघका केन्द्रीय अध्यक्ष बिपुल पोख्रलको प्रमुख आतिथ्यमा बैठक सम्पन्न भएको थियो ।

बैठकलाई सम्बोधन गर्दै केन्द्रीय अध्यक्ष पोख्रेलले फ्रि मिडिया नेटवर्क पत्रकारिताका बिषयमा समिक्षा गर्ने, सुझावहरु लिने र प्रेस स्वतन्त्रताका मुद्धामा सामूहिक समाधान खोज्ने साझा थलो भएको बताउनुभयो । यसमा पत्रकारितामा भएका विकृती, विसंगती र समस्याबारे खुलेर आफ्ना बिचार व्यक्त गर्ने र त्यसमा सुधारका लागि सुझाव दिन सकिने भएकाले पत्रकारितालाई मर्यादीत बनाउन नेटवर्कले महत्वपूर्ण भूमिका खेल्नसक्ने उनले बताए ।

बैठकमा सहभागी बिभिन्न सरोकारवालाहरुले जिल्लाको पत्रकारिताबारे समिक्षा गर्दै सामाजिक सञ्जाल र कतिपय अनलाइनहरुमा तथ्यजाँच नगरी समाचार दिने र नागरिकलाई भ्रमित पार्ने काम भैरहेको गुनाशो गरेका थिए । बैठकले यस्ता गतिबिधिलाई नियमन गर्ने व्यवस्था मिलाउन सरोकारवाला निकायलाई आग्रह गरेको छ ।

यसैगरी बैठकले यही २०७९ फाल्गुन ४ गते बिहिबार घोराहीमा ‘स्थानीय तहको योजना तर्जुमा प्रक्रियालाई समावेशी बनाउन सञ्चार क्षेत्रको भूमिका’ बिषयक अन्तक्र्रिया कार्यक्रम आयोजना गर्ने निर्णय गरेको छ । बैठकमा नेपाल पत्रकार महासंघ दाङ शाखा सल्लाहकार एवं पूर्व अध्यक्ष सुदिप गौतम, सल्लाहकार लक्ष्मी आचार्य, घोराही उपमहानगरपालिका वडानं. १५ का अध्यक्ष रमेश पाण्डे, जिल्ला प्रशासन कार्यालयका प्रशासकीय अधिकृत दलबहादुर बस्नेत र जिल्ला प्रहरी कार्यालय दाङका प्रवक्ता डिएस्पी राजनकुमार गौतम सहभागी हुनुहुन्थ्यो ।

यसैगरी बैठकमा नेपाल बार एशोसिएशन जिल्ला बार इकाई दाङका अध्यक्ष मुरली घिमिरे, राप्ती साहित्य परिषद्का केन्द्रीय अध्यक्ष टिकाराम उदासी, दाङ जिल्ला उद्योग बाणिज्य संघका महासचिव महेन्द्र बुढाथोकी, महिला मानवअधिर रक्षक संजाल दाङकी अध्यक्ष सुशिला पौडेल, पत्रकार महासंघ दाङका उपाध्यक्षहरु सन्तोष सुवेदी र बसुन्धारा गौतम लगाएतको उपस्थिती थियो ।