मिडिया खबरदारीले दिगो विकासमा टेवा: सरोकारवाला
घोराही । मिडियाको निरन्तर खबरदारीबिना दिगो विकास सम्भव नहुने सरोकारवालाहरुले बताएका छन । फ्रि मिडिया नेटवर्कको आयोजना र नेपाल पत्रकार महासंघ दाङको समन्वयमा बुधबार घोराहीमा आयोजना गरिएको स्थानीय तहको योजना तर्जुमा प्रक्रियालाई समावेशी बनाउन सञ्चार क्षेत्रको भूमिका विषयक अन्तत्र्रिmया कार्यक्रममा बोल्दै सरोकारवालाहरुले सञ्चारमाध्यमको भूमिका अनिवार्य र प्रभावकारी हुनुपर्नेमा जोड दिएका हुन् ।
कार्यक्रमका प्रमुख अतिथि एवं नेपाल पत्रकार महासंघका केन्द्रीय अध्यक्ष विपुल पोख्रेलले योजना निर्माणमा हुने समावेशिताले बलियो राष्ट्र निर्माण हुने बताउनुभयो । ‘योजना निर्माणमा मुख्यगरी मिडियाको काम खबरदारी गर्ने नै हो । समावेशी भए नभएको बारे सम्बन्धित पक्षको ध्यानाकर्षण गराउने हो’– अध्यक्ष पोख्रेलले भन्नुभयो– ‘यदि मिडिया नभए लक्षितवर्गले नै लाभ लिन सक्दैन । लक्षितवर्गसम्म लाभ पु¥याउने काम मिडियाले खबरदारी गरेर, ध्यानाकर्षण गरेर गर्छ ।’ उहाँले मिडियाको प्रभावकारी खबरदारीबिना दिगो विकास सम्भव नभएको बताउनुभयो तर त्यो खबरदारी गर्ने र ध्यानाकर्षण गराउँदा सुन्ने वातावरण स्थानीय सरकारले बनाउनुपर्ने अध्यक्ष पोख्रेलको भनाइ थियो ।
कार्यक्रममा बोल्दै तुलसीपुर उपमहानगरपालिकाका प्रमुख टीकाराम खड्काले योजना छनोटका चरण र विधिअनुसार नै हुने भन्दै यसलाई थप प्रभावकारी बनाउन मिडियाले खबरदारी र लक्षित समुदायलाई पनि सचेत बनाउन जरुरी रहेको बताउनुभयो ।
घोराही उपमहानगरपालिकाका उपप्रमुख हुमा डिसीले समावेशी योजना निर्माणमा विस्तारै सुधार हुँदै गएको भन्दै मिडियालाई निरन्तर खबरदारी गर्न सुझाव दिनुभयो । सो अवसरमा गढवा गाउँपालिकाका अध्यक्ष यमनारायण शर्माले आफ्नो पहिलो कार्यकाल भएकाले यसपटक हतार–हतारमा बजेट, नीति कार्यक्रम ल्याउनुपरेको भन्दै आउँदा दिनमा योजना निर्माणलाई समावेशी बनाउने प्रतिबद्धता व्यक्त गर्नुभयो । उहाँले लक्षितवर्ग, समुदायको सहभागिता बढाउन मिडियालाई हस्तक्षेपकारी भूमिका खेल्न सुझाव दिनुभयो ।
यस्तै बंगलाचुली गाउँपालिकाका उपाध्यक्ष भक्तबहादुर जिसीले योजना निर्माण कर्मकाण्डी भएको स्वीकार्नुभयो । समावेशी बनाउने नाममा सानातिना छलफल हुने तर वास्तविकरुपमा उनीहरुको समस्या र आवाज सम्बोधन हुनेगरी योजना छनोटको काम हुन नसकेको भन्दै यसलाई विस्तारै सुधार गर्दै लैजाने बताउनुभयो । कार्यक्रममा राप्ती गाउँपालिका उपप्रमुख कमलापती चौधरीले समावेशी योजना निर्माणमा सचेतनाको काम गर्ने भूमिका मिडियाको भन्दै यसलाई प्रभावकारी बनाउन आग्रह गर्नुभयो ।
नेपाल पत्रकार महासंघ दाङका अध्यक्ष एवं फ्रि मिडिया नेटवर्क दाङका संयोजक दुर्गालाल केसीको अध्यक्षतामा भएको कार्यक्रममा नागरिक समाजका अगुवाहरुले स्थानीय तहले योजना निर्माणलाई आफूखुशी बनाएको र लक्षित समुदायलाई थाहै नहुने भन्दै टिप्पणी गरेका थिए । कार्यक्रममा तुलसीपुर उपमहानगरपालिकाका उपप्रमुख स्यानी चौधरी, राप्ती गाउँपालिकाका प्रमुख प्रशासकीय अधिकृत नेवबहादुर वली, प्रेस काउन्सिल नेपालका सदस्य शरद अधिकारी, नागरिक समाज दाङका संयोजक केवी मसाल, नागरिक समाजकै चक्र विश्वकर्मा, कुसुन्डा समाजका धनबहादुर कुसुन्डा, महिला मानवअधिकार रक्षक सञ्जालका सुशीला पौडेल, पत्रकार सुदर्शन रिजाल, लायन्स क्लव अफ घोराहीका पवन योगीलगायतले बोल्नुभएको थियो । कार्यक्रममा नेपाल पत्रकार महासंघका उपाध्यक्ष सन्तोष सुवेदीले स्थानीय तहमा समावेशी योजना निर्माणसम्बन्धी आधारपत्र प्रस्तुत गर्नुभएको थियो । महासंघका उपाध्यक्ष बसुन्धरा गौतमको स्वागत मन्तव्यबाट शुरु भएको कार्यक्रमको सञ्चालन सचिव आरके शीतलले गर्नुभएको थियो ।
नयाँ युगबोध राष्ट्रिय दैनिक